फाईल तस्विर
शनिबार जगदम्बा १२औं जितपुरसिमरा गोल्डकप फुटबलको उपाधि उचालेको छ । सिमरा रंगशालामा न्युरोड टिम (एनआरटी) विभागीय प्रतिद्वन्द्वी एपीएफ क्लबलाई ५–० को फराकिलो अन्तरले हराउँदै उपाधि जितेको हो ।
एनआरटीलाई उपाधि दिलाउनेक्रममा मेसुके ओलोमाइ र स्टेफेन समीरले २–२ गोल तथा दीपेश घलेले एक गोल गरेका थिए । एनआरटीका लागि यो उपाधि सिजनकै पहिलो हो ।
एनआरटीले २०६४ सालमा बुढासुब्बा गोल्डकप जितेयता पहिलो पटक नकआउट प्रतियोगिता जितेको हो ।
प्रतिस्पर्धात्मक पहिलो हाफको इन्ज्युरी समयमा गोलको खाता खोलेको एनआरटीले दोस्रो हाफमा चार गोल थपेको थियो । मेसुकेले गोल गर्दै एनआरटीलाई अग्रता दिलाए । दीपेश धिमालले विशाल घलानलाई लडाएपछि प्राप्त फ्रिकिकमा मेसुकेले मध्यान्तर हुनैलाग्दा गोल गरेका थिए । बक्सबाहिरबाट मेसुकेले गरेको प्रहारले सिधै जालीको सम्पर्कमा पुगेको थियो । उक्त प्रहार रोक्न एपीएफका गोलरक्षक राजु नगरकोटी असफल भए । एनआरटीले खेलको ६०औं मिनेटमा दोस्रो थोल थप्यो । मेसुकेको क्रसलाई सदुपयोग गर्दै दीपेश घलेले दोस्रो गोल गरेका थिए ।
दोस्रो पटक फाइनल पुगेर उपविजेतामा सीमित हुन पुगेको एपीएफ सुरुदेखि नै आक्रामक खेले पनि फिनिसिङमा चुकेको थियो । खेलमा दुई गोलले अग्रता लिएको एनआरटीले ७७ औं मिनेटमा तेस्रो गोल गर्यो । स्टेफेन समीरले गोल थप्दै ३–० को स्थितिमा पुर्याए ।
करिब १० हजार दर्शकको उपस्थित रंगशालामा ‘ए’ डिभिजनका दुई टिमबीचको खेल प्रतिस्पर्धात्मक हुने अपेक्षा गरिएको थियो । तर एनआरटीले लगातार गोल गर्दै नतिजा आफ्नो पक्षमा पार्यो । खेलको ८१ औं मिनेटमा एनआरटीले चौथो गोल थप्दा एपीएफ समर्थक निराश बन्न पुगे । मेसुकेले टिमका लागि चौथो र प्रतियोगितामा व्यक्तिगत पाँचौं गोल गरे ।
