फाईल तस्विर
धनगढी — सुदूरपश्चिमका मुख्यमन्त्री त्रिलोचन भट्टलाई विश्वासको मत प्रदान गर्न नेकपा एमाले संसदीय दलले गरेको निर्णयको ओली पक्षधर ७ जना सांसदले उल्लंघन गरेका छन् ।
सांसदहरु रतन थापा, नेपालु चौधरी, लीलाधर भट्ट, पठानसिंह बोहरा, माया तामाङ, बलदेव रेग्मी र ग्याल्बोसिंह बोहराले विपक्षमा मतदान गरेको प्रमुख सचेतक दुर्गाकुमारी कामीले बताइन् । ‘उहाँहरुले संसदीय दलको ह्विप उल्लंघन गर्नुभयो,’ प्रमुख सचेतक कामीले भनिन् ।
नेकपा एमाले पार्टीले विश्वासको मतको विपक्षमा मतदान गर्न निर्देशन गरेको थियो भने संसदीय दलले पक्षमा मतदान गर्ने निर्णय गरेको थियो । विपक्षमा मतदान गर्ने सांसदहरुले पार्टीको निर्देशनको पालना गरेको बताएका छन् ।
सभामुखसहित ५२ सदस्यीय प्रदेशसभामा मुख्यमन्त्री भट्टले ३० मत प्राप्त गरेका छन् । विश्वासको मत पाउन २७ सदस्य भए पुग्थ्यो । एमाले १७ जना र मुख्यमन्त्री भट्टको आफ्नै दल माओवादी केन्द्रका १३ गरी ३० मत प्राप्त गरेका हुन् । विपक्षमा ९ मत परेको छ । विपक्षमा मतदान गर्नेमा एमालेका ७ र जसपाका २ जना सांसदहरु हुन् ।
कांग्रेसका १२ जना सांसद मतदानमा सहभागी भएनन् ।
