फाईल तस्विर
काठमाडौँ — नयाँ सरकार गठन र पार्टीको भूमिकाबारे जनता समाजवादी पार्टी (जसपा)आन्तरिक छलफलमा जुटेको छ । सरकार गठनका लागि एक दिन समय बाँकी रहेको अवस्थामा प्रतिनिधिसभाको चौथो ठूलो र निर्णायक दल जसपाका शीर्ष नेताहरू आपसी विवादका बीच आन्तरिक छलफलमा जुटेका हुन् ।
जसपाका शीर्ष नेताहरू बुधबार दिउँसो छलफलका लागि पार्टी कार्यालय बालकुमारीमा जम्मा भएका छन् । अध्यक्ष महन्थ ठाकुरनिकट स्रोतका अनुसार जसपाका अध्यक्ष महन्थ ठाकुर र वरिष्ठ नेता राजेन्द्र महतो प्रधानमन्त्री केपी ओलीलाई भेटेर बालकुमारी पुगेका हुन् । प्रधानमन्त्रीसँग लामो छलफलपछि उनीहरू बालुकमारी पुगेर अध्यक्ष उपेन्द्र यादव, संघीय परिषद् अध्यक्ष डा. बाबुराम भट्टराई लगायत शीर्ष नेता छलफलमा जुटेका हुन् ।
‘सरकार गठनबारे जसपामा थप केही निर्णय भइसकेको छैन । अहिले भेटघाट हुन लागेको छ,’ अध्यक्ष उपेन्द्र यादवले कान्तिपुरसँग भने ।
सरकार गठनका लागि कांग्रेस सभापति शेरबहादुर देउवा छलफलमा रहेका छन् । उनले माओवादी केन्द्र, एमालेको झलनाथ खनाल-माधवकुमार नेपाल र जसपाको उपेन्द्र यादव-बाबुराम भट्टराई पक्षसँग निरन्तर छलफल गरिरहेका छन् । जसपाको ठाकुर पक्षले भने ओलीको विकल्प खोज्न नसकिने भनेर देउवासँग छलफलमा चासो देखाएको छैन ।
