फाईल तस्विर
काठमाडौँ — क्यूआर कोडमार्फत दैनिक डेढ करोड रुपैयाँभन्दा बढीको भुक्तानी कारोबार हुने राष्ट्र बैंकको तथ्यांकले देखाएको छ । राष्ट्र बैंकले मंगलबार सार्वजनिक गरेको सात महिनाको आर्थिक तथा वित्तीय प्रतिवेदनअनुसार माघमा मात्रै क्यूआर कोडमार्फत १ अर्ब ७१ करोड २० लाख रुपैयाँको कारोबार भएको छ ।
राष्ट्र बैंकका अनुसार यो कारोबार गत पुस महिनाको तुलनामा ४६ करोड ७० लाख रुपैयाँ बढी हो । माघमा क्यूआर कोडमार्फत भएको भुक्तानी औसतमा गणना गर्दा दैनिक डेढ करोडभन्दा बढी हुन आउँछ । माघमा क्यूआर कोडमार्फत दैनिक औसत १ करोड ५५ लाख ६६ हजार ६ सय रुपैयाँ भुक्तानी कारोबार भएको छ । पछिल्लो केही महिनायता राष्ट्र बैंककले क्यूआर कोडमार्फत हुने भुक्तानीलाई प्रोत्साहन गरिरहेको छ । केही साताअघि मात्रै राष्ट्र बैंकले क्यूआर कोडमार्फत हुने भुक्तानीका लागि मापदण्ड नै जारी गरेको थियो ।
माघमा मात्रै क्यूआर कोडमार्फत ५ लाख ३५ हजारभन्दा बढी पटक कारोबार भएको राष्ट्र बैंकको तथ्यांक छ । पुसको तुलनामा माघमा क्यूआरमार्फत हुने भुक्तानीको संख्या उल्लेख्य बढेको तथ्यांकले देखाएको छ । पुसमा ३ लाख ७२ हजार १ सय पटक क्यूआर कोडमार्फत कारोबार भएकामा माघमा १ लाख ६३ हजारले बढेको हो । चालु आर्थिक वर्षको सात महिनामा मात्रै क्यूआर कोडमार्फत हुने कारोबार संख्या र भुक्तानी रकम दुवै उल्लेख्य बढेको राष्ट्र बैंकले बताएको छ । तथ्यांकअनुसार साउनमा क्यूआर कोडमार्फत करिब दुई लाख पटक कारोबार भएको थियो । तर माघसम्म आइपुग्दा कारोबार संख्या बढेर करिब साढे पाँच लाख पुगेको छ ।
पछिल्लो सात महिनामा क्यूआर कोडमार्फत हुने भुक्तानी रकम पनि करिब ५९ करोडबाट बढेर करिब पौने २ अर्ब पुगेको छ । साउनमा क्यूआर कोडमार्फत कुल ५८ करोड ९० लाख रुपैयाँ मात्रै भुक्तानी भएको थियो । पछिल्लो ७ महिनामा क्यूआर कोडमार्फत हुने भुक्तानी रकम १ अर्ब १२ करोड ३० लाखले बढेको राष्ट्र बैंकको तथ्यांक छ । पछिल्लो सात महिनामा मोबाइल बैंकिङमार्फत हुने कारोबार पनि उल्लेख्य बढेको छ । माघमा मात्रै मोबाइल बैंकिङमार्फत ९६ लाख ७२ हजारभन्दा बढी पटक कारोबार भएको थियो । यो कारोबार संख्याबाट ३८ अर्ब ५९ करोड ७० लाख रुपैयाँ बराबरको कारोबार भएको छ ।
यसअनुसार मोबाइल बैंकिङमार्फत दैनिक औसत १ अर्ब २८ करोडको कारोबार हुने देखिन्छ । चालु आर्थिक वर्षको साउनमा मोबाइल बैंकिङमार्फत ५८ लाख १७ हजार पटक कारोबार भई १८ अर्ब ८३ करोड रुपैयाँ भुक्तानी भएको थियो । पछिल्लो सात महिनामा मोबाइल बैंकिङमार्फत हुने कारोबार र भुक्तानी रकम दोब्बर बढेको राष्ट्र बैंकको तथ्यांक छ । मोबाइल बैंकिङको कारोबार र भुक्तानी रकम दोब्बर वृद्धि हुँदा यो अवधिमा इन्टरनेट बैंकिङमार्फत हुने कारोबार भने आधाले घटेको छ । साउनमा इन्टरनेट बैंकिङमार्फत ६ लाख ५३ हजार ४ सय पटक कारोबार भएको थियो । त्यसको कारोबार रकम १९ अर्ब रुपैयाँ थियो । माघमा भने इन्टनरनेट बैंकिङबाट हुने कारोबार संख्या ३ लाख १० हजार ४ सयमा झरेको छ । यो महिनामा इन्टरनेट बैंकिङमार्फत भएको कारोबार रकम ९ अर्ब २२ करोड ७० लाख रुपैयाँमा झरेको छ ।
मोबाइल बैंकिङ र क्यूआर कोडको कारोबार उल्लेख्य बढेको देखिए पनि वालेटको कारोबार संख्या र कारोबारको रकम भने सुस्त छ । साउनमा वालेटमार्फत करिब १ करोड १ लाख ८० हजार पटक कारोबार भएकामा माघ महिनामा यसको संख्या १ करोड ५१ लाख पुगेको छ । वालेट प्रयोगकर्ताको संख्या सुस्त गतिमा भए पनि कारोबार रकम भने घटेको राष्ट्र बैंकको तथ्यांकले देखाउँछ । साउनमा वालेटमार्फत १० अर्ब २२ करोड कारोबार भएकामा माघमा आइपुग्दा कारोबार रकम ९ अर्ब ९४ करोड ८० लाखमा सीमित भएको छ ।
