फाईल तस्विर
म्यानमारमा सैनिक कू भएको एक महिना बितिसक्दा पनि विरोध प्रदर्शन जारी छ। प्रदर्शन हिंसात्मक पनि बन्दै गएको छ।
हिजो बुधबार एकैदिन ३८ जनाको मृत्यु भएको छ। संयुक्त राष्ट्रसंघले यसलाई ‘रक्तपातपूर्ण बुधबार’ भनेको छ। म्यानमारस्थित राष्ट्रसंघका राजदूत क्रिस्टिन श्रेनरले मुटु नै हल्लाउने भिडियो फुटेजहरु बाहिर आइरहेको बताएका छन्।
गत फेब्रुअरी एक तारिखमा भएको सैनिक सत्तापलटपछि पूरै म्यानमारभरि विरोध प्रदर्शन भइरहेको छ। आङ सान सू ची सहित नेताहरुलाई रिहा गर्नुपर्ने माग प्रदर्शनकारीले गरेका छन्।
अहिलेसम्मको प्रदर्शनमा ५० जनाको मृत्यु भइसकेको बताइएको छ। कैयौं घाइते भएका छन्। प्रहरीले निहत्था नागरिकलाई पिटेको र गोलीसमेत हानेका भिडियो सार्वजनिक भइरहेका छन्।
सेभ द चिल्ड्रेनका अनुसार ब्धबार मारिनेमा १४ र १७ वर्षका किशोर पनि छन्। १९ वर्षकी एक किशोरी पनि मारिएकी छन्।
