फाईल तस्विर
काठमाडौं । देशभर कोरोना भाइरस संक्रमणबाट मृत्यु हुनेको संख्या १ प्रतिशत नाघेको छ । यो तथ्यले कोरोना संक्रमणको जोखिम कायमै रहेको देखाएको छ । मास्कको समुचित प्रयोग नगरिनु र भौतिक दूरीमा बेवास्ता गर्ने प्रवृत्ति बढेकाले जोखिम बढ्न थालेको चिकित्सकले बताएका छन् ।
स्वास्थ्य तथा जनसंख्या मन्त्रालयका अनुसार हालसम्म कुल संक्रमित २ लाख ७३ हजार ९ सय ८४ जनामध्ये २ हजार ७ सय ७१ जनाको मृत्यु भएको छ । यसरी हेर्दा कुल संक्रमितमध्ये १.०१ प्रतिशतको मृत्यु भएको देखिन्छ ।
शुक्रवार देशभर १ सय १२ जनामा कोरोना संक्रमण देखिएको छ । देशभर सक्रिय संक्रमितको संख्या ९ सय ३६ जना रहेको छ । शुक्रबार ३ हजार ९ सय ४४ जनाको पीसीआर परीक्षण भएको छ । योसँगै नेपालमा पीसीआर परीक्षण हुनेको संख्या २१ लाख ५७ हजार ५ सय ८० पुगेको छ ।
शुक्रबार थप दुई जना कोरोना संक्रमितको मृत्यु भएको छ । २४ घण्टामै प्राप्त भएको मृत्यु संख्या भन्दै मन्त्रालयले थप चार जना समावेश गरेको छ । हाल देशभर ७१ जना क्वारेन्टाइनमा रहेका छन् ।
गत २४ घण्टामा ५४ जना उपचारपछि डिस्चार्ज भएका छन् । योसँगै नेपालमा निको हुनेको संख्या २ लाख ७० हजार २ सय ७७ पुगेको मन्त्रालयले जनाएको छ । हालसम्म कुल संक्रमितमध्ये ९८ दशमलव ६५ प्रतिशत संक्रमणमुक्त भएका छन् । पछिल्लो एक सातालाई आधार मान्दा केही दिनयता दैनिक संक्रमण हुने दर १ सयको हाराहारीमा रहेको छ ।
