फाईल तस्विर
मध्यपश्चिमाञ्चल विश्वविद्यालय सुर्खेत र चाइना थ्री गोर्जेस विश्वविद्यालय चीनबीच शैक्षिक सहकार्यका लागि सम्झौता भएको छ । मध्यपश्चिमाञ्चल
विश्वविद्यालयका तर्फबाट उपकुलपति प्रा.डा. नन्दबहादुर सिंह र चाइना थ्री गोर्जेस विश्वविद्यालयका तर्फबाट प्रिजिडेन्ट प्रा. ही वेइजुनले
सम्झौतापत्रमा हस्ताक्षर गरेका छन् ।
अन्तर्राष्ट्रिय सम्बन्ध कायम गर्न तथा दुई विश्वविद्यालयबीच आपसी समझदारी र शैक्षिक सहकार्य स्थापना गर्नु यस सम्झौताको मुख्य उदेश्य
रहेको सम्झौता पत्रमा उल्लेख गरिएको छ । सम्झौता पश्चात दुई विश्वविद्यालयबीच विशेष गरी प्राध्यापक, शोधकर्ता, प्रशासनिक कर्मचारी तथा
विश्वविद्यालयमा अध्यनरत विद्यार्थीहरु आदानप्रदान हुनेछन् ।दुइटै विश्वविद्यालयले सामूहिक रुपमा अनुसन्धानसँग सम्बन्धित परियोजनाहरु
अगाडि बढाउन सकिने सम्झौतामा उल्लेख गरिएको छ । त्यसै गरी विभिन्न लेक्चर तथा गोष्ठीहरु आयोजना गरिनेछन् भने एक आपसमा विभिन्न
शैक्षिक जानकारी तथा समाग्रीहरु आदानप्रदान हुनेछन् ।
यस सम्झौताको मर्म पूरा गर्न तथा दुवै देशको कानुन र सम्झौता परिधिमा रही विश्वविद्यालय अन्तर्गतका संकाय, स्कुल वा संस्थाहरुले एक
आपसमा समझदारी गरी विभिन्न परियोजनाहरु संचालन गर्न सक्नेछन् । दुई विश्वविद्यालयबीच भएको यस सम्झौताको अवधि सम्झौता
मितिदेखि पाँच वर्षको रहनेछ भने त्यस पश्चात स्वतः नवीकरण हुनेछ । साथै आपसी समझदारी र छलफल पश्चात लिखित रुपमा सम्झौता
संशोधन गर्न सकिने व्यवस्था सम्झौतामा उल्लेख गरिएको छ ।
चाइना थ्री गोर्जेस विश्वविद्यालय हाइड्रोइलेक्ट्रिक इञ्जिनियरिङ्ग र इलेक्ट्रिकल इञ्जिनियरिङ्ग विषयका लागि प्रख्यात छ भने स्वास्थ्य, संचार तथा
कम्प्युटर प्रविधि, स्पोर्ट्स, अर्थशास्त्र, व्यवस्थापन लगायतका विषयहरु पढाइ हुने चीनकै एक अग्रणी तथा प्रख्यात विश्वविद्यालय हो ।
