फाईल तस्विर
काठमाडौं । यो वर्षको जाडोयाम आजबाट समाप्त भएर प्रि–मनसुन सिजन सुरु भएको छ । मौसम पूर्वानुमान महाशाखाका अनुसार मार्च १ बाट प्रि–मनसुन सुरु हुन्छ ।
यो सिजनमा अपरान्ह र साँझतिर मेघगर्जन र चट्याङ्गको सम्भावना रहनुको साथै हावाहुरी र असिना पानीको सम्भावना उच्च रहन्छ ।
यस्तो मौसममा मेघगर्जन/चट्याङ्ग/हावाहुरी/असिना–पानीबाट हुन सक्ने क्षतिबाट जोगिन आवश्यक सतर्कता अपनाउन हुन मौसम पूर्वानुमान महाशाखाले आग्रह गरेको छ ।
आजबाट प्रि–मनसुन तीन महिना रहन्छ । जुन १ बाट मनसुन सुरु हुन्छ । “जुन १ बाट मनसुन सुरु हुन्छ भनिए पनि त्यसमा केही समय अगाडि वा पछाडि हुनसक्छ,” मौसमविद् निराजन सापकोटा भन्छन् ।
प्रि–मनसुनमा वाह्य मौसमी प्रणाली भित्रिँदैन । स्थानीय वायुको प्रभावले बादल लाग्ने र तत्काल मेघगर्जन/चट्याङ्ग/हावाहुरी/असिना–पानी पर्ने सापकोटा बताउँछन् । यो ठूलो क्षेत्रमा नभएर स्थानीय वायुको प्रभावका कारण हुने भएकाले सानो–सानो क्षेत्रमा हुने उनी बताउँछन् ।
आज दिउँसो प्रदेश १, वाग्मती, गण्डकी, कर्णाली र सुदूरपश्चिम प्रदेशका उच्च पहाडी तथा हिमाली भू–भागमा आंशिक बदली रहने छ । बाँकी भू–भागमा मौसम सामान्यतया सफा रहने महाशाखाले जनाएको छ ।
प्रदेश १ र गण्डकी प्रदेशका उच्च पहाडी तथा हिमाली भू–भागका एक–दुई स्थानमा हल्का हिमपातको सम्भावना छ ।
महाशाखाका अनुसार आज राति प्रदेश १, गण्डकी र सुदूरपश्चिम प्रदेशका उच्च पहाडी तथा हिमाली भू–भागमा आंशिक बदली र बाँकी भू–भागमा मौसम सामान्यतया सफा रहने छ ।
यसैबीच, आज विहान १०.४ डिग्री सेल्सियस तापक्रम रहेको काठमाडौंका दिउँसो २७–२९ डिग्री सेल्सियससम्म पग्ने छ ।
